ଇତିହାସ ରଚିଲେ ବୈଭବ ସୂର୍ଯ୍ୟବଂଶୀ
ଧୂଳିସାତ୍ ହେଲା ଖ୍ରୀସ୍ ଗେଲ୍ଙ୍କ ୧୪ ବର୍ଷର ମହା-ରେକର୍ଡ!
୨୯ ବଲ୍ ୯୭ ରନ୍, ୧୨ ଛକା… ଆଇପିଏଲ୍ରେ ନୂଆ ଝଡ଼ ବୈଭବ!
ବୋଲରଙ୍କ ନିଦ ହଜାଇଲା ଯୁବ ସେନସେସନ୍!
ଆଇପିଏଲ୍ ଇତିହାସରେ ଏମିତି ଝଡ଼ ବୋଧହୁଏ ଆଗରୁ କେବେ ଆସିନଥିଲା। ସନରାଇଜର୍ସ ହାଇଦ୍ରାବାଦର ଯେଉଁ ଘାତକ ବୋଲିଂ ଲାଇନଅପ୍ ପୂରା ସିଜିନ୍ରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲା, ଗୋଟିଏ ସନ୍ଧ୍ୟାରେ ତାହାର ଅହଂକାର ଭାଙ୍ଗି ଚୁରମାର୍ କରିଦେଲେ ରାଜସ୍ଥାନ ରୟାଲ୍ସର ଜଣେ ଯୁବ କିଶୋର।
ବୁଧବାର ଖେଳାଯାଇଥିବା ଏଲିମିନେଟର ମ୍ୟାଚ୍… କ୍ରିଜ୍ରେ ଏଣ୍ଟ୍ରି ମାରିଲେ ଟିନ୍-ଏଜ୍ ସେନସେସନ୍ ‘ବୈଭବ ସୂର୍ଯ୍ୟବଂଶୀ’। ଆଉ ତା’ପରେ ଆରମ୍ଭ ହେଲା ବିସ୍ଫୋରଣ। ଅଧିନାୟକ ପ୍ୟାଟ୍ କମିନ୍ସଙ୍କ ଠାରୁ ଆରମ୍ଭ କରି ଇଶାନ୍ ମାଲିଙ୍ଗା ଏବଂ ସାକିବ ହୁସେନଙ୍କ ପର୍ଯ୍ୟନ୍ତ… କାହାକୁ ବି ଛାଡିନଥିଲେ ବୈଭବ। ପଡିଆର ଚତୁର୍ଦ୍ଦିଗରେ ଦେଖିବାକୁ ମିଳିଥିଲା କେବଳ ଛକା ଆଉ ଛକା।
ନିଜର ଏହି ଐତିହାସିକ ଇନିଂସରେ ସେ ମାତ୍ର ୨୯ ବଲରୁ ସଂଗ୍ରହ କରିଥିଲେ ୯୭ ରନ୍। ଯେଉଁଥିରେ ସାମିଲ ଥିଲା ବିଶାଳ ୧୨ଟି ଛକା ଓ ୫ଟି ଚୌକା। ତାଙ୍କର ଷ୍ଟ୍ରାଇକ୍ ରେଟ୍ ଥିଲା ୩୩୪.୪୮! ଏହି ମହା-ବିସ୍ଫୋରକ ଇନିଂସ ବେଳେ ବୈଭବ ଏକ ଏମିତି ରେକର୍ଡ ନିଜ ନାମରେ କରିଛନ୍ତି, ଯାହା ଶୁଣିଲେ ଆପଣ ଆଶ୍ଚର୍ଯ୍ୟ ହୋଇଯିବେ। ସେ ‘ୟୁନିଭର୍ସ ବସ୍’ ଖ୍ରୀସ୍ ଗେଲ୍ଙ୍କ ୧୪ ବର୍ଷର ପୁରୁଣା ରେକର୍ଡକୁ ମଧ୍ୟ ପଛରେ ପକାଇଦେଇଛନ୍ତି। ୨୦୧୨ ମସିହାରେ ଗୋଟିଏ ସିଜିନରେ ଗେଲ୍ ସର୍ବାଧିକ ୫୯ଟି ଛକା ମାରିଥିବା ବେଳେ, ବୈଭବ ମ୍ୟାଚ୍ର ମାତ୍ର ୧୦ ଓଭର ପୂର୍ବରୁ ହିଁ ସେହି ମହା-ରେକର୍ଡକୁ ଅତିକ୍ରମ କରିଯାଇଥିଲେ।
କମିନ୍ସଙ୍କ ଓଭରରେ ବୈଭବ ଯେତେବେଳେ ଲଗାତାର ୩ଟି ଛକା ମାରିଲେ, ହାଇଦ୍ରାବାଦ ଶିବିରରେ ସମ୍ପୂର୍ଣ୍ଣ ନିରବତା ଖେଳିଯାଇଥିଲା। ପାୱାରପ୍ଲେ ଭିତରେ ହିଁ ରାଜସ୍ଥାନ ୮୦ ରନ୍ ସଂଗ୍ରହ କରିଥିଲା, ଯେଉଁଠି ଯଶସ୍ୱୀ ଜୟସ୍ୱାଲ କେବଳ ନିରବ ଦର୍ଶକ ସାଜିଥିଲେ। ଗେଲ୍ଙ୍କ ୩୦ ବଲର ଦ୍ରୁତତମ ଶତକ ରେକର୍ଡ ଠାରୁ ମାତ୍ର କିଛି ଇଞ୍ଚ ଦୂରରେ ବୈଭବ ଆଉଟ୍ ହୋଇଥିଲେ ମଧ୍ୟ, ତାଙ୍କର ଏହି ଇନିଂସ ଆଇପିଏଲ୍ ଇତିହାସରେ ଏକ ନୂଆ ଅଧ୍ୟାୟ ସୃଷ୍ଟି କରିଛି।