ସଫ୍ଟୱେର୍ ନୁହେଁ, ଆଇନରେ ଚାଲିବ ଦେଶ!
ବିନା ଶୁଣାଣିରେ କଟିବନି ଭୋଟରଙ୍କ ନାଁ!
ନିର୍ବାଚନ ଆୟୋଗଙ୍କୁ ହାଇକୋର୍ଟଙ୍କ କଡ଼ା ତାଗିଦ!
ମେସିନ୍ ନୁହେଁ, ମଣିଷ ପାଇଁ ନିୟମ!
ସିଷ୍ଟମ୍ ତ୍ରୁଟି ପାଇଁ ଲୋକେ ହଟହଟା!
ଡିଜିଟାଲ୍ ବ୍ୟବସ୍ଥାର ବାହାବା ନେଉଥିବା ସରକାରୀ ବାବୁମାନଙ୍କ ପାଇଁ ଏକ ବଡ଼ ଝଟକା… କାରଣ ଦେଶ କୌଣସି କମ୍ପ୍ୟୁଟର ସଫ୍ଟୱେର୍ ହିସାବରେ ନୁହେଁ, ବରଂ ସମ୍ବିଧାନ ଓ ଆଇନ ଅନୁଯାୟୀ ଚାଲିବ! ବମ୍ବେ ହାଇକୋର୍ଟଙ୍କ ଏହି ଐତିହାସିକ ରାୟ ଏବେ ସିଷ୍ଟମର ଅସଲ ମୁଖା ଖୋଲିଦେଇଛି।
ଟେକ୍ନୋଲୋଜି ନାଁରେ କିଭଳି ଗଣତନ୍ତ୍ର ସହ ଖେଳ ଖେଳାଯାଉଛି, ତାହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି ପୁନେରେ। ଗୋଟିଏ ପରିବାର ଠିକଣା ବଦଳାଇବା ପାଇଁ ଫର୍ମ-୮ ପୂରଣ କଲେ, ହେଲେ ଆୟୋଗଙ୍କ ମହାନ ‘ସଫ୍ଟୱେର୍’ ଏହାକୁ ଗ୍ରହଣ କଲାନି। ଆଉ ଆଶ୍ଚର୍ଯ୍ୟର କଥା, ନିଜ ସିଷ୍ଟମର ତ୍ରୁଟି ସୁଧାରିବା ବଦଳରେ ଅଧିକାରୀମାନେ ଲୋକଙ୍କୁ ବାଧ୍ୟ କଲେ ଫର୍ମ-୬ ପୂରଣ କରିବାକୁ! ଯନ୍ତ୍ରର ତ୍ରୁଟି ପାଇଁ ଜଣେ ସାଧାରଣ ନାଗରିକ ତାଙ୍କ ମୂଲ୍ୟବାନ ଭୋଟଦାନ ଅଧିକାରରୁ କାହିଁକି ବଞ୍ଚିତ ହେବେ? ଏହା କି ପ୍ରକାର ଡିଜିଟାଲ୍ ବିକାଶ ଯେଉଁଠି ମେସିନ୍ ଆଗରେ ମଣିଷର ଅଧିକାର ମୂଲ୍ୟହୀନ?
ଏହି ମାମଲାରେ କୋର୍ଟ ନିର୍ବାଚନ ଆୟୋଗଙ୍କୁ କଡ଼ା ଭାଷାରେ ତାଗିଦ କରିଛନ୍ତି। ସ୍ପଷ୍ଟ ନିର୍ଦ୍ଦେଶ ଦେଇଛନ୍ତି ଯେ- ବିନା ଶୁଣାଣିରେ କିମ୍ବା ଉପଯୁକ୍ତ ସୁଯୋଗ ନଦେଇ କାହାରି ନାଁ ଭୋଟର ତାଲିକାରୁ କାଟିପାରିବେ ନାହିଁ ଆୟୋଗ। କୌଣସି ସଫ୍ଟୱେର୍ ବା ତୃତୀୟ ପକ୍ଷର ତ୍ରୁଟିର ଆଳ ଦେଖାଇ ଲୋକଙ୍କୁ ଆଉ ଅସହାୟ କରିଦିଆଯାଇପାରିବ ନାହିଁ। ଏହି ଘଟଣାରେ ସମ୍ପୃକ୍ତ ନିର୍ବାଚନ ଅଧିକାରୀଙ୍କୁ ତୁରନ୍ତ ହାଜର ହେବାକୁ ନିର୍ଦ୍ଦେଶ ମଧ୍ୟ ଦିଆଯାଇଛି।
ହାଇକୋର୍ଟଙ୍କ ଏହି କଡ଼ା ଚାବୁକ୍ ପ୍ରମାଣ କରିଛି ଯେ- ମଣିଷର ସୁବିଧା ପାଇଁ ଟେକ୍ନୋଲୋଜି ତିଆରି ହୋଇଛି, ମେସିନ୍ ପାଇଁ ମଣିଷ ନୁହେଁ। ଯାନ୍ତ୍ରିକ ତ୍ରୁଟିର ବାହାନା ଦେଖାଇ ନିର୍ବାଚନ ଆୟୋଗ ଭଳି ସଂସ୍ଥା ଆଉ ନିଜ ଦାୟିତ୍ୱରୁ ଖସିପାରିବେ ନାହିଁ। ଏବେ ପ୍ରଶ୍ନ ଉଠୁଛି, କୋର୍ଟଙ୍କ ଏହି ଛାଟ ପରେ କଣ ଶୋଇଥିବା ପ୍ରଶାସନର ଚେତା ପଶିବ?