ରାଜପଥ ନିର୍ମାଣରେ ବଡ଼ ବିଳମ୍ବ!
ଅଦାଲତରେ ଶହ ଶହ ମାମଲା!
କୋଟି କୋଟି ଟଙ୍କା ଅଟକ!
ଜମି ବିବାଦ ସାଜିଲା ପ୍ରତିବନ୍ଧକ!
ପ୍ରଶାସନର ଉଚ୍ଚସ୍ତରୀୟ ତତ୍ପରତା ବୃଦ୍ଧି!
ଭୁବନେଶ୍ବର: ରାଜ୍ୟରେ ଉନ୍ନତ ସଡ଼କ ଭିତ୍ତିଭୂମି ଓ ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟରେ ଗୁରୁତର ବାଧା ସୃଷ୍ଟି ହୋଇଛି। ଜମି ଅଧିଗ୍ରହଣ ଏବଂ ବିଭିନ୍ନ ଆଇନଗତ ମାମଲା ଯୋଗୁଁ ରାଜ୍ୟର ପାଖାପାଖି ୨୩ଟି ଜିଲ୍ଲାରେ ୪୦ରୁ ଅଧିକ ପ୍ରକଳ୍ପର କାମ ଅଟକି ରହିଛି। କୋଟି କୋଟି ଟଙ୍କାର ବଜେଟ୍ ଥିବା ସତ୍ତ୍ୱେ କ୍ଷତିପୂରଣ ବଣ୍ଟନ ଓ ଜମି ହସ୍ତାନ୍ତର ବିଳମ୍ବ ଯୋଗୁଁ ଲୋକଙ୍କ ସୁବିଧା ପାଇଁ ଉଦ୍ଦିଷ୍ଟ ରାସ୍ତା କାର୍ଯ୍ୟ ଆଗେଇ ପାରୁନାହିଁ। ମିଳିଥିବା ସୂଚନା ଅନୁଯାୟୀ, ରାଇରଙ୍ଗପୁର ବାଇପାସ୍ ପ୍ରକଳ୍ପ ପାଇଁ ଆବଶ୍ୟକ ଜମି ବାବଦରେ ୨୨୫ ଟି ଅଦାଲତ ମାମଲା ମଧ୍ୟରୁ ପ୍ରାୟ ୧୯୬ ଟି ମାମଲା ଏପର୍ଯ୍ୟନ୍ତ ବିଚାରାଧୀନ ରହିଛି। ସେହିପରି ଧର୍ମଗଡ଼ ବାଇପାସ୍ ପାଇଁ ୧୧୪ଟି, କୁଆଖିଆ-ମଙ୍ଗଳପୁର ସେକ୍ସନ ପାଇଁ ୬୬ ଟି ଏବଂ ଜୟପୁର ବାଇପାସ୍ ପାଇଁ ୩୭ଟି ମାମଲା ରହିଛି। ଆଇନଗତ ପ୍ରକ୍ରିୟା ସମାପ୍ତ ନହେବା ପର୍ଯ୍ୟନ୍ତ ନିର୍ମାଣ କାର୍ଯ୍ୟ ଆଗକୁ ବଢ଼ିବା କଷ୍ଟକର ହୋଇପଡ଼ିଛି। କେବଳ ଆଇନଗତ ସମସ୍ୟା ନୁହେଁ, ସ୍ଥାନୀୟ ସ୍ତରରେ ବିରୋଧ ଏବଂ ପ୍ରଶାସନିକ ଅନୁମୋଦନରେ ବିଳମ୍ବ ମଧ୍ୟ ଏକ ପ୍ରମୁଖ କାରଣ ପାଲଟିଛି। ଉଦାହରଣ ସ୍ୱରୂପ, ଜାତୀୟ ରାଜପଥ-୨୬ର ପାଷ୍ଟିକୁଡ଼ି ଫ୍ଲାଏଓଭର୍ ନିର୍ମାଣ ପାଇଁ ଉଚ୍ଛେଦ ପ୍ରକ୍ରିୟା ଆରମ୍ଭ ବେଳେ ବ୍ୟାପକ ବିରୋଧ ଦେଖାଦେଇଥିଲା। ସେପଟେ ଝାରସୁଗୁଡ଼ା ବାଇପାସ୍ ସହ ଜଡ଼ିତ ଜମି ମାଲିକଙ୍କ ପ୍ରାୟ ୧୦.୭୬ କୋଟି ଟଙ୍କାର ଭରଣା ପ୍ରକ୍ରିୟା ଏବେ ବି ବିଚାରାଧୀନ ରହିଛି।ଏଭଳି ସ୍ଥିତିରେ ପ୍ରକଳ୍ପଗୁଡ଼ିକୁ ଶୀଘ୍ର ଶେଷ କରିବା ଲକ୍ଷ୍ୟରେ ପ୍ରଶାସନ ପକ୍ଷରୁ ସର୍ବୋଚ୍ଚ ସ୍ତରରେ ଗୁରୁତ୍ୱପୂର୍ଣ୍ଣ ସମୀକ୍ଷା କରାଯାଇଛି। ବକେୟା ଥିବା କ୍ଷତିପୂରଣ ଅର୍ଥକୁ ତୁରନ୍ତ ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି। ବିବାଦ ଥିବା ସ୍ଥାନରେ ଜମି ଅର୍ଥକୁ ସିଭିଲ୍ କୋର୍ଟରେ ଡିପୋଜିଟ୍ କରି ନିର୍ମାଣ କାର୍ଯ୍ୟ ଆଗେଇ ନେବା ସହ ମଧ୍ୟସ୍ଥତା ପ୍ରକ୍ରିୟା ଶୀଘ୍ର ସାରିବା ଉପରେ ଜୋର୍ ଦିଆଯାଇଛି। ରାସ୍ତା ନିର୍ମାଣ କାର୍ଯ୍ୟ ସମୟ ସୀମା ଭିତରେ ସରିଲେ ହିଁ ସାଧାରଣ ଲୋକଙ୍କୁ ଯାତାୟାତରେ ସୁବିଧା ମିଳିପାରିବ। ବର୍ତ୍ତମାନ ପ୍ରଶାସନିକ ସ୍ତରରେ ନିଆଯାଉଥିବା କଡ଼ା ପଦକ୍ଷେପ ଫଳରେ ଏହି ସମସ୍ତ ଅଟକି ରହିଥିବା ପ୍ରକଳ୍ପ କେବେ ସମ୍ପୂର୍ଣ୍ଣ ହେଉଛି, ତାହା ଦେଖିବାକୁ ବାକି ରହିଲା।