ଦିଲ୍ଲୀରେ ମହାଭାରତ
ମୋଦୀଙ୍କ ବିରୋଧରେ ନବୀନ!
ଇଣ୍ଡିଆ ମେଣ୍ଟର ପ୍ରତିବାଦକୁ ବିଜେଡିର ସମର୍ଥନ !
ମୋଦୀ-ଶାହଙ୍କୁ ଘେରିଲେ ବିରୋଧୀ!
ଇସ୍ତଫା ଦେବେ କି CEC?
ଅକ୍ଟୋବର ୬, ୨୦୨୬… ଦିଲ୍ଲୀର ରାଜରାସ୍ତାରେ ଆଜି ଦେଖିବାକୁ ମିଳିଛି ବଡ଼ ରାଜନୈତିକ ଝଡ଼। ଇଣ୍ଡିଆ ମେଣ୍ଟର ସାଂସଦମାନେ ସଂସଦ ଭବନରୁ ନିର୍ବାଚନ କମିଶନ ମୁଖ୍ୟାଳୟ ଆଡ଼କୁ ଏକ ବିଶାଳ ଶୋଭାଯାତ୍ରା ବାହାର କରିଛନ୍ତି। ଅଭିଯୋଗ ହେଉଛି ‘ଭୋଟ୍ ଚୋରି’ ଏବଂ ଭୋଟର ତାଲିକା ସଂଶୋଧନରେ ଅନିୟମିତତା। ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ମଧ୍ୟ ଏହି ମାର୍ଚ୍ଚରେ ସାମିଲ ଅଛନ୍ତି। ବିରୋଧୀଙ୍କ ସିଧାସଳଖ ଟାର୍ଗେଟରେ ଅଛନ୍ତି ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର, ଯାହାଙ୍କ ଇସ୍ତଫା ଦାବି କରି ରାସ୍ତାକୁ ଓହ୍ଲାଇଛନ୍ତି ବିରୋଧୀ ନେତା।
ରାହୁଲ ଗାନ୍ଧୀ ଏବଂ ଅଖିଳେଶ ଯାଦବଙ୍କ ସମେତ ଅନେକ ନେତା ନିର୍ବାଚନ ଆୟୋଗ ଅଫିସରୁ ମାତ୍ର ୨୦୦ ମିଟର ଦୂରରେ ଧାରଣାରେ ବସିଥିବା ବେଳେ କିଛି ସାଂସଦ ବ୍ୟାରିକେଡ୍ ଉପରେ ଚଢ଼ି ତୀବ୍ର ପ୍ରତିବାଦ କରୁଛନ୍ତି। ଆମ୍ ଆଦମୀ ପାର୍ଟି ସିଧାସଳଖ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ କଡ଼ା ସମାଲୋଚନା କରିଛି। ଆପ୍ ଅଭିଯୋଗ କରିଛି ଯେ, ନିଜର ଭୂମିକା ପଦାରେ ପଡ଼ିଯିବା ଭୟରେ କେନ୍ଦ୍ର ସରକାର ସିଇସିଙ୍କୁ ସୁରକ୍ଷା ଦେବାକୁ ପ୍ରୟାସ କରୁଛନ୍ତି। ଗଣତନ୍ତ୍ରକୁ ବଞ୍ଚାଇବା ପାଇଁ ବିଜେପିକୁ କ୍ଷମତାରୁ ହଟାଇବା ଜରୁରୀ ବୋଲି ଦଳ ଆହ୍ୱାନ ଦେଇଛି।
ଏହି ରାଜନୈତିକ ଉତ୍ତେଜନା ମଧ୍ୟରେ ଏକ ନୂଆ ମୋଡ଼ ଆସିଛି। ଦଳର ସଭାପତି ନବୀନ ପଟ୍ଟନାୟକଙ୍କ ନିର୍ଦ୍ଦେଶକ୍ରମେ ବିଜେଡି ସାଂସଦମାନେ ମଧ୍ୟ ଏହି ବିରୋଧୀ ଶୋଭାଯାତ୍ରାରେ ସାମିଲ ହୋଇଛନ୍ତି। ଭୋଟର ତାଲିକା ସଂଶୋଧନ ପ୍ରକ୍ରିୟାରେ ସିଇସିଙ୍କ ଭୂମିକାକୁ ନେଇ ବିଜେଡି ତାଙ୍କ ଇସ୍ତଫା ଦାବି କରିଆସୁଛି।
ଆଗକୁ ଏହି ଲଢ଼େଇ ଆହୁରି ତୀବ୍ର ହେବାକୁ ଯାଉଛି। ସେପ୍ଟେମ୍ବର ୩୦ ତାରିଖରେ ୧୯ ଟି ବିରୋଧୀ ଦଳର ବୈଠକ ପରେ ଏହି ପ୍ରତିବାଦ ଡାକରା ଦିଆଯାଇଥିଲା। ଏବେ ଏସଆଇଆରକୁ ନେଇ ଚିନ୍ତା ପ୍ରକଟ କରିବା ପାଇଁ ଇଣ୍ଡିଆ ମେଣ୍ଟର ନେତାମାନେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟିବାର କାର୍ଯ୍ୟକ୍ରମ ରହିଛି। ଅନ୍ୟପଟେ ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ସଂସଦ ଏବଂ ନିର୍ବାଚନ କମିଶନ ମୁଖ୍ୟାଳୟ ଚାରିପଟେ ବ୍ୟାପକ ସୁରକ୍ଷାକର୍ମୀ ମୁତୟନ ସହ ବ୍ୟାରିକେଡିଂ କରାଯାଇଛି। ଆକାଶବାଣୀ ଏବଂ ଇସିଆଇ ଅଞ୍ଚଳରେ ରାପିଡ୍ ଆକ୍ସନ୍ ଫୋର୍ସ ର କଡ଼ା ପହରା ଦେଖିବାକୁ ମିଳିଛି। ବର୍ତ୍ତମାନ ସବୁଠୁ ବଡ଼ ପ୍ରଶ୍ନ, କଣ ସିଇସି ଇସ୍ତଫା ଦେବେ? ନା ସରକାର ଏହି ବିରୋଧକୁ ଚାପିଦେବାରେ ସଫଳ ହେବେ? ସସପେନ୍ସ ବଢ଼ୁଛି, ଆଉ ଦିଲ୍ଲୀର ରାଜନୀତି ସରଗରମ ହେବାରେ ଲାଗିଛି।