ଆର୍ ଏସ୍ ଏସ କୁ ମିଳୁନି ଶୋଭାଯାତ୍ରା ଅନୁମତି
ସବୁଥର ଶୋଭାଯାତ୍ରା ବେଳେ ମନା କରୁଛନ୍ତି ସରକାର
ସରକାରଙ୍କୁ ହାଇକୋର୍ଟଙ୍କ କଡ଼ା ପ୍ରଶ୍ନ!
ଶୋଭାଯାତ୍ରା ପାଇଁ ଅନୁମତି ମିଳୁନି କାହିଁକି?
ପୁଲିସର ଯୁକ୍ତିକୁ ନେଇ ବି ପ୍ରଶ୍ନ!
ଆଲୋଚନା କରି ସମାଧାନ ପାଇଁ ନିର୍ଦ୍ଦେଶ!
ନିଜ ନାଗରିକଙ୍କୁ ସରକାର କ’ଣ ଶତ୍ରୁ ଭାବେ ଦେଖୁଛନ୍ତି?
ତାମିଲନାଡୁ ସରକାରଙ୍କ ଆଭିମୁଖ୍ୟକୁ ନେଇ ଏଭଳି କଡ଼ା ପ୍ରଶ୍ନ ଉଠାଇଛନ୍ତି ମାଡ୍ରାସ ହାଇକୋର୍ଟ। ଆରଏସଏସ୍ର ଶୋଭାଯାତ୍ରାକୁ ବାରମ୍ବାର ଅନୁମତି ନମିଳିବା ଘଟଣାର ଶୁଣାଣି ବେଳେ, ଅକ୍ଟୋବର ୧୪ ତାରିଖରେ ବିଚାରପତି ଭି. ଲକ୍ଷ୍ମୀନାରାୟଣନ ରାଜ୍ୟ ପୁଲିସ ଓ ସରକାରଙ୍କ ଆଭିମୁଖ୍ୟକୁ ନେଇ ଅସନ୍ତୋଷ ପ୍ରକାଶ କରିଛନ୍ତି।
ଶୁଣାଣି ସମୟରେ ବିଚାରପତି ପ୍ରଶ୍ନ କରିଥିଲେ, ଜମ୍ମୁ କାଶ୍ମୀର ଭଳି ସମ୍ବେଦନଶୀଳ ଅଞ୍ଚଳରେ ଯଦି ଶୋଭାଯାତ୍ରା ହୋଇପାରୁଛି, ତେବେ ତାମିଲନାଡୁରେ କାହିଁକି ଅନୁମତି ଦିଆଯାଉନାହିଁ? କେବଳ ଗୋଟିଏ ସଂଗଠନ ନୁହେଁ, ଅନ୍ୟାନ୍ୟ ସଂଗଠନର କାର୍ଯ୍ୟକ୍ରମକୁ ମଧ୍ୟ ଅନୁମତି ମିଳୁନଥିବା ନେଇ ଅଦାଲତ ପ୍ରଶ୍ନ ଉଠାଇଥିଲେ।
ବାରମ୍ବାର ଅନୁମତି ନାକଚ ହେବା ଫଳରେ ଆୟୋଜକମାନଙ୍କୁ ଅଦାଲତର ଦ୍ୱାରସ୍ଥ ହେବାକୁ ପଡ଼ୁଛି। ଏଭଳି ପରିସ୍ଥିତିକୁ ନେଇ ବିଚାରପତି ଉଦ୍ବେଗ ପ୍ରକାଶ କରିଥିଲେ। ସୂଚନା ଅନୁସାରେ, ଉତ୍ତର ତାମିଲନାଡୁର ଆରଏସଏସ୍ ପଦାଧିକାରୀ ଭି.ଜି. ଜଗଦୀଶନ ଏହି ମାମଲାରେ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି।
ଅକ୍ଟୋବର ୧୮, ଅକ୍ଟୋବର ୨୫ ଏବଂ ନଭେମ୍ବର ୧ ତାରିଖରେ ଶୋଭାଯାତ୍ରା ଓ ସାଧାରଣ ସଭା ଆୟୋଜନ ପାଇଁ ଅନୁମତି ଦେବାକୁ ସେ ଆବେଦନ କରିଥିଲେ। ଆବେଦନକାରୀଙ୍କ ପକ୍ଷରୁ କୁହାଯାଇଥିଲା ଯେ, ପ୍ରତିବର୍ଷ ଶୋଭାଯାତ୍ରା ପାଇଁ ଅନୁମତି ମାଗିଲେ ପୁଲିସ ଆଇନଶୃଙ୍ଖଳା ସମସ୍ୟାର ଆଶଙ୍କା ଦର୍ଶାଇ ଅନୁମତି ଦେଉନାହିଁ।
ଫଳରେ ସଂଗଠନକୁ ବାରମ୍ବାର ଅଦାଲତର ଆଶ୍ରୟ ନେବାକୁ ପଡ଼ୁଛି। ଅନ୍ୟପଟେ ରାଜ୍ୟ ସରକାରଙ୍କ ପକ୍ଷରୁ ମଧ୍ୟ ଅଦାଲତରେ ନିଜର ଯୁକ୍ତି ରଖାଯାଇଛି। ଆଡ୍ଭୋକେଟ୍ ଜେନେରାଲ୍ ବିଜୟ ନାରାୟଣ କହିଥିଲେ, ଶୋଭାଯାତ୍ରା ଓ ସାଧାରଣ ସଭା ପାଇଁ ପ୍ରସ୍ତାବିତ କେତେକ ସ୍ଥାନ ଏଭଳି କାର୍ଯ୍ୟକ୍ରମ ପାଇଁ ନିର୍ଦ୍ଧାରିତ ନୁହେଁ।
ଏହାଛଡ଼ା ପାର୍ବଣ ସମୟରେ ପୁଲିସ ମୁତୟନ ଏବଂ ସାଧାରଣ ଲୋକଙ୍କ ସୁବିଧା ଭଳି ବିଷୟକୁ ମଧ୍ୟ ବିଚାରକୁ ନେବାକୁ ପଡ଼ିବ ବୋଲି ସରକାରଙ୍କ ପକ୍ଷରୁ କୁହାଯାଇଥିଲା। ତେବେ ଅଦାଲତ ପ୍ରଶ୍ନ କରିଥିଲେ, ପ୍ରତିବର୍ଷ ସମାନ ପ୍ରସଙ୍ଗରେ କାହିଁକି ମାମଲା ହେଉଛି? ପୂର୍ବରୁ ଶୋଭାଯାତ୍ରା ସମ୍ପର୍କରେ ଅଦାଲତ ନିର୍ଦ୍ଦେଶାବଳୀ ଜାରି କରିଥିଲେ। ଏହା ସତ୍ତ୍ୱେ ଅନୁମତିକୁ ନେଇ ବିବାଦ ଲାଗି ରହିଛି।
ଏହି ପ୍ରସଙ୍ଗରେ ଆୟୋଜକମାନଙ୍କ ପକ୍ଷରୁ ପାଞ୍ଚଜଣ ପ୍ରତିନିଧିଙ୍କୁ ରାଜ୍ୟ ସରକାରଙ୍କ ଓକିଲଙ୍କ ସହ ଆଲୋଚନା କରିବାକୁ କୁହାଯାଇଛି। ଶାନ୍ତିପୂର୍ଣ୍ଣ ଭାବେ କାର୍ଯ୍ୟକ୍ରମ କିପରି ଆୟୋଜନ ହୋଇପାରିବ, ସେନେଇ ସମାଧାନ ବାହାର କରିବାକୁ ଅଦାଲତ ପରାମର୍ଶ ଦେଇଛନ୍ତି।
ଏଠାରେ ଗୁରୁତ୍ୱପୂର୍ଣ୍ଣ କଥା ହେଉଛି, ନାଗରିକଙ୍କ ପ୍ରତି ସରକାରଙ୍କ ଆଭିମୁଖ୍ୟକୁ ନେଇ ବିଚାରପତି ଦେଇଥିବା ଟିପ୍ପଣୀ ଶୁଣାଣି ସମୟର ମୌଖିକ ପର୍ଯ୍ୟବେକ୍ଷଣ। ଏହା ଶୋଭାଯାତ୍ରାକୁ ଅନୁମତି ଦେବା ସମ୍ପର୍କରେ ଅଦାଲତଙ୍କ ଚୂଡ଼ାନ୍ତ ରାୟ ନୁହେଁ। ଅନୁମତି ସମ୍ପର୍କିତ ପ୍ରସଙ୍ଗରେ ଉଭୟ ପକ୍ଷଙ୍କ ଆଲୋଚନା ଏବଂ ପରବର୍ତ୍ତୀ ଅଦାଲତୀ ପ୍ରକ୍ରିୟା ଉପରେ ଏବେ ନଜର ରହିଛି।
ତେବେ ଏହି ଘଟଣା ପୁଣିଥରେ ଏକ ଗୁରୁତ୍ୱପୂର୍ଣ୍ଣ ପ୍ରଶ୍ନ ସାମ୍ନାକୁ ଆଣିଛି। ଶାନ୍ତିପୂର୍ଣ୍ଣ ଶୋଭାଯାତ୍ରା କରିବାର ନାଗରିକ ଅଧିକାର ଓ ଆଇନଶୃଙ୍ଖଳା ରକ୍ଷା କରିବାର ପ୍ରଶାସନିକ ଦାୟିତ୍ୱ ମଧ୍ୟରେ କିପରି ସନ୍ତୁଳନ ରହିବ? ଅଦାଲତଙ୍କ ପ୍ରଶ୍ନ ପରେ ତାମିଲନାଡୁ ପୁଲିସ ଓ ଆୟୋଜକମାନଙ୍କ ଆଲୋଚନାରୁ କେଉଁ ସମାଧାନ ବାହାରୁଛି, ତାହା ଦେଖିବାକୁ ବାକି ରହିଲା।