ଭୁବନେଶ୍ୱରରେ ଶେଷ ହେଉଛି ପେଟ୍ରୋଲ !
ଶୁଖିଲା ପଡ଼ିଲାଣି ପେଟ୍ରୋଲ ପମ୍ପ, ଏବେ କେମିତି ଚାଲିବ ଗାଡ଼ି?
ମନ୍ତ୍ରୀଙ୍କ ବଡ଼ ପରାମର୍ଶ: ପେଟ୍ରୋଲ ଛାଡ଼ନ୍ତୁ, ଇଭି ଆପଣାନ୍ତୁ!
୨୦୨୮ ଯାଏଁ ମିଳିବ ସବସିଡି! ଇଲେକ୍ଟ୍ରିକ୍ ଗାଡ଼ି କିଣିବାକୁ ମନ୍ତ୍ରୀଙ୍କ ଗ୍ରୀନ୍ ସିଗନାଲ୍
ପେଟ୍ରୋଲ ପମ୍ପରେ ଲାଗିଲା କଡ଼ା କଟକଣା!
ସାବଧାନ ଓଡ଼ିଶା! ଆପଣଙ୍କ ଗାଡ଼ିର ଟାଙ୍କି ଫୁଲ୍ ଅଛି ତ? ନା ଅଧା ବାଟରେ ଅଟକି ଯାଉଛି ଆପଣଙ୍କ ଯାତ୍ରା? ମଧ୍ୟପ୍ରାଚ୍ୟରେ ଲାଗିଥିବା ଯୁଦ୍ଧର ନିଆଁ ଏବେ ଆପଣଙ୍କ ପକେଟ୍ ଏବଂ ଗାଡ଼ିର ଇଞ୍ଜିନକୁ ପ୍ରଭାବିତ କରିବାକୁ ଯାଉଛି। ବିଶ୍ୱ ବଜାରରେ ଅଶୋଧିତ ତୈଳ ଦର ଆକାଶଛୁଆଁ ହେଉଥିବା ବେଳେ, ଏହାର ଭୟଙ୍କର ପ୍ରଭାବ ଏବେ ଓଡ଼ିଶାର ପେଟ୍ରୋଲ ପମ୍ପରେ ଦେଖିବାକୁ ମିଳିଲାଣି।
ରାଜ୍ୟର କୋଣ ଅନୁକୋଣରେ ଏବେ ହାହାକାର। ଅନେକ ସ୍ଥାନରେ ପେଟ୍ରୋଲ ପମ୍ପ ଗୁଡ଼ିକରେ ଝୁଲୁଛି ‘ନୋ ଷ୍ଟକ୍’ର ବୋର୍ଡ। ଯେଉଁଠି ତେଲ ମିଳୁଛି, ସେଠାରେ ଲମ୍ବା ଲାଇନ୍ ଏବଂ କଠୋର କଟକଣା। କେଉଁଠି ବାଇକ୍ ପାଇଁ ମାତ୍ର ୨୦୦ ଟଙ୍କାର ତେଲ ତ କେଉଁଠି କାର୍ ପାଇଁ ୨୦୦୦ ଟଙ୍କାର ସୀମା ଧାର୍ଯ୍ୟ କରାଯାଇଛି। କିନ୍ତୁ ପ୍ରଶ୍ନ ଉଠୁଛି, ଏ ସଂକଟ କେବେ ସରିବ? କେତେ ଦିନ ଚାଲିବ ଏଭଳି ପରିସ୍ଥିତି?
ଏହି ସଂକଟ ଭିତରେ ବଡ଼ ବୟାନ ରଖିଛନ୍ତି ରାଜ୍ୟ ପରିବହନ ମନ୍ତ୍ରୀ ବିଭୂତି ଭୂଷଣ ଜେନା। ମନ୍ତ୍ରୀ କହିଛନ୍ତି, ଏବେ ସମୟ ଆସିଛି ନିଜକୁ ବଦଳାଇବାର। ପେଟ୍ରୋଲ-ଡିଜେଲ୍ ଉପରେ ନିର୍ଭରଶୀଳତା କମାଇବା ପାଇଁ ସେ ରାଜ୍ୟବାସୀଙ୍କୁ ଏକ ବଡ଼ ପରାମର୍ଶ ଦେଇଛନ୍ତି। ମନ୍ତ୍ରୀଙ୍କ ସ୍ପଷ୍ଟ ସଙ୍କେତ- “ଏବେ ଆପଣାନ୍ତୁ ଇଭି ବା ଇଲେକ୍ଟ୍ରିକ୍ ଗାଡ଼ି”।
କେବଳ ପରାମର୍ଶ ନୁହେଁ, ସରକାର ନିଜେ ମଧ୍ୟ ଏହି ପରିବର୍ତ୍ତନର ସୂତ୍ରଧର ସାଜିବେ। ସରକାରୀ କାର୍ଯ୍ୟାଳୟରେ ବ୍ୟବହାର ହେଉଥିବା ଗାଡ଼ି ଗୁଡ଼ିକୁ ଇଭିରେ ପରିବର୍ତ୍ତନ କରାଯିବ। ଏପରିକି ମନ୍ତ୍ରୀ ନିଜେ କହିଛନ୍ତି, ଆବଶ୍ୟକ ପଡ଼ିଲେ ସେ ମଧ୍ୟ ବସରେ ଯାତ୍ରା କରିବେ। କିନ୍ତୁ ସବୁଠାରୁ ବଡ଼ ଖବର ହେଉଛି ‘ସବସିଡି’। ଇଭି ଗାଡ଼ି କିଣିବା ଉପରେ ମିଳୁଥିବା ସରକାରୀ ପ୍ରୋତ୍ସାହନ ବା ସବସିଡିର ସମୟସୀମାକୁ ୨୦୨୮ ପର୍ଯ୍ୟନ୍ତ ବୃଦ୍ଧି କରାଯିବ ବୋଲି ମନ୍ତ୍ରୀ ଘୋଷଣା କରିଛନ୍ତି।
ତୈଳ ସଂକଟରୁ ମୁକ୍ତି ପାଇଁ ଏହା କ’ଣ ଏକ ସ୍ଥାୟୀ ସମାଧାନ? ରାଜ୍ୟବାସୀ ମନ୍ତ୍ରୀଙ୍କ ଏହି ଅପିଲକୁ କେତେ ଗ୍ରହଣ କରୁଛନ୍ତି? ପେଟ୍ରୋଲ ପମ୍ପର ଶୁଖିଲା ପାଇପ୍ ଆଉ ଇଲେକ୍ଟ୍ରିକ୍ ଗାଡ଼ିର ଚାର୍ଜିଂ ପଏଣ୍ଟ- ଏହି ଦୁଇଟି ମଧ୍ୟରେ ଏବେ ଓଡ଼ିଶାର ଭବିଷ୍ୟତ। ଆଜି ହିଁ ସତର୍କ ହୁଅନ୍ତୁ ଏବଂ ବିକଳ୍ପ ଚିନ୍ତା କରନ୍ତୁ।