ଦିଲ୍ଲୀ ଦରବାରରେ ପହଞ୍ଚିଲା ସିଜିମାଳିର ଚିତ୍କାର
ସସ୍ମିତ ପାତ୍ରଙ୍କ ବଡ଼ ପଦକ୍ଷେପ !
ଜୁଆଲ ଓରାମଙ୍କ ପରେ ଏବେ NCST ଅଧ୍ୟକ୍ଷଙ୍କ ଦ୍ୱାରସ୍ଥ
ଆଦିବାସୀଙ୍କ ହକରେ କିଏ ପକାଉଛି ଆଖି?
ସିଜିମାଳି! ଓଡ଼ିଶାର ଏକ ସମ୍ବେଦନଶୀଳ ଅଞ୍ଚଳ, ଯେଉଁଠି ଆଜି ବିକାଶ ନାଁରେ ବିନାଶର ଆଶଙ୍କା ଆଦିବାସୀଙ୍କୁ ଶୋଇବାକୁ ଦେଉନି। ନିଜର ମାଟି ଆଉ ପରିଚୟ ପାଇଁ ଲଢୁଥିବା ସିଜିମାଳିର ସରଳ ଆଦିବାସୀଙ୍କ ଉପରେ ହେଉଥିବା ପୋଲିସ ପ୍ରଶାସନର ମାତ୍ରାଧିକ କାର୍ଯ୍ୟାନୁଷ୍ଠାନ ଏବେ ଜାତୀୟ ସ୍ତରରେ ଚର୍ଚ୍ଚାର ବିଷୟ ପାଲଟିଛି। FRA ଏବଂ PESA ଆଇନର ଖୋଲାଖୋଲି ଉଲ୍ଲଂଘନକୁ ନେଇ ରାଜ୍ୟସଭା ସାଂସଦ ସସ୍ମିତ ପାତ୍ର ଏବେ ସିଧାସଳଖ ଜାତୀୟ ଆଦିବାସୀ କମିଶନଙ୍କ ଦ୍ୱାରସ୍ଥ ହୋଇଛନ୍ତି। କାହିଁକି ସିଜିମାଳିରେ ବାରମ୍ବାର ନିର୍ଯାତନାର ଅଭିଯୋଗ ଆସୁଛି? କାହିଁକି ଆଦିବାସୀଙ୍କ ଅଧିକାରକୁ କରାଯାଉଛି ଅଣଦେଖା? ଆସନ୍ତୁ ଜାଣିବା ଏହି ରିପୋର୍ଟରେ…
ରାୟଗଡ଼ା ଜିଲ୍ଲା ସିଜିମାଳିରେ ଅସନ୍ତୋଷର ନିଆଁ କେବଳ ଧୂଆଁଉ ନାହିଁ, ବରଂ ଏହା ଏକ ଜନ-ଆନ୍ଦୋଳନର ରୂପ ନେଇଛି। ଖଣି ଖନନକୁ ନେଇ ସ୍ଥାନୀୟ ଲୋକଙ୍କ ବିରୋଧ ଏବଂ ତାହାକୁ ଦମନ କରିବା ପାଇଁ ପୋଲିସର ଚଢ଼ାଉ, ଗିରଫଦାରୀ ଓ ଅମାନବୀୟ ବ୍ୟବହାରକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି। ଅଭିଯୋଗ ହେଉଛି ଯେ, ସେଠାରେ ଆଦିବାସୀଙ୍କ ସୁରକ୍ଷା ପାଇଁ ଥିବା ‘ପେସା’ (PESA) ଆଇନ ଏବଂ ‘ଜଙ୍ଗଲ ଅଧିକାର ଆଇନ’ (FRA) ର ମୌଳିକ ନିୟମକୁ ବଳି ଦିଆଯାଉଛି।
ଏହି ଗୁରୁତର ଘଟଣାକୁ ନେଇ ଦିଲ୍ଲୀରେ ତତ୍ପରତା ଦେଖାଇଛନ୍ତି ପୂର୍ବତନ ସାଂସଦ ସସ୍ମିତ ପାତ୍ର। ସେ ଜାତୀୟ ଆଦିବାସୀ କମିଶନ (NCST) ର ଅଧ୍ୟକ୍ଷ ଶ୍ରୀଯୁକ୍ତ ଅନ୍ତର ସିଂ ଆର୍ଯ୍ୟଙ୍କୁ ଭେଟି ଏକ ଫର୍ମାଲ୍ ପିଟିସନ ଦାଖଲ କରିଛନ୍ତି। ସେ ଅଭିଯୋଗ କରିଛନ୍ତି ଯେ, ସିଜିମାଳିରେ ଆଦିବାସୀଙ୍କ ମାନବାଧିକାର କ୍ଷୁଣ୍ଣ ହେଉଛି। ପୂର୍ବରୁ କେନ୍ଦ୍ରମନ୍ତ୍ରୀ ଜୁଆଲ ଓରାମଙ୍କୁ ଚିଠି ଲେଖିବା ପରେ ଏବେ NCST ଙ୍କୁ ଭେଟି ସେ ଏକ ବିଧିବଦ୍ଧ ତଦନ୍ତ ପାଇଁ ଦାବି କରିଛନ୍ତି।
ସସ୍ମିତ ପାତ୍ରଙ୍କ କହିବା କଥା ହେଲା, “ନ୍ୟାୟ ଅପେକ୍ଷା କରିପାରିବ ନାହିଁ।” ଆଦିବାସୀଙ୍କ ଭୟ ଓ ଅଶାନ୍ତିକୁ ପ୍ରଶାସନିକ କ୍ଷମତା ବଳରେ ଚପାଇ ଦେବା ଏକ ଗଣତାନ୍ତ୍ରିକ ରାଷ୍ଟ୍ର ପାଇଁ ଶୋଭନୀୟ ନୁହେଁ। କେଉଁ ପରିସ୍ଥିତିରେ ଆଦିବାସୀଙ୍କ ଉପରେ ପୋଲିସ ବଳ ପ୍ରୟୋଗ କଲା ଏବଂ କେଉଁ ଆଧାରରେ ସେମାନଙ୍କ ସାମ୍ବିଧାନିକ ଅଧିକାରକୁ ଅଣଦେଖା କରାଗଲା, ତାର ଉତ୍ତର ରଖିବାକୁ ହେବ। ତେବେ ସିଜିମାଳିର ଏହି ଲଢ଼େଇ କେବଳ ଏକ ଖଣିର ଲଢ଼େଇ ନୁହେଁ, ଏହା ହେଉଛି ସମ୍ମାନ ଏବଂ ସୁରକ୍ଷାର ଲଢ଼େଇ। ସସ୍ମିତ ପାତ୍ରଙ୍କ ଏହି ପିଟିସନ ପରେ ଏବେ ସିଜିମାଳିବାସୀ ନ୍ୟାୟ ଆଶାରେ ରହିଛନ୍ତି।