ଆପଣ ବି ଘରେ ଶୁଆ ରଖିଛନ୍ତି କି?
ଶୁଆ ପାଳିବା ଶୁଭ ନା ଅଶୁଭ?
ବୁଧ ଗ୍ରହ ଓ ବାସ୍ତୁ ଦୋଷ ଉପରେ ଶୁଆର ପ୍ରଭାବ
ପଞ୍ଜୁରୀରେ ଶୁଆ ରଖିବା ପୂର୍ବରୁ ଏହି ନିୟମ ଜାଣିନିଅନ୍ତୁ!
ପ୍ରାୟତଃ ଅନେକ ଘରେ ଲୋକମାନେ ଶୁଆ ପାଳିଥାନ୍ତି। କିନ୍ତୁ ଅନେକ ସମୟରେ ମନରେ ପ୍ରଶ୍ନ ଉଠେ ଯେ ଘରେ ଶୁଆ ରଖିବା ଦ୍ୱାରା କ’ଣ ଲାଭ ହୁଏ ଏବଂ କ’ଣ କ୍ଷତି ହୋଇପାରେ? ଆଜି ଆମେ ସେହି ବିଷୟରେ ବିସ୍ତୃତ ଭାବେ ଜାଣିବା।
ଜ୍ୟୋତିଷ ମାନ୍ୟତା:
ଜ୍ୟୋତିଷ ଶାସ୍ତ୍ର ଅନୁଯାୟୀ, ଶୁଆର ସବୁଜ ରଙ୍ଗ ହେତୁ ଏହାର ସମ୍ବନ୍ଧ ‘ବୁଧ ଗ୍ରହ’ ସହିତ ରହିଛି। ବିଶ୍ୱାସ କରାଯାଏ ଯେ ଘରେ ଶୁଆ ରଖିଲେ ବୁଧ ଗ୍ରହ ସମ୍ବନ୍ଧୀୟ ଦୋଷ ଦୂର ହୋଇଥାଏ।
ପୌରାଣିକ ଉଦାହରଣ:
ଶୁଆ ଯେକୌଣସି କଥାକୁ ଖୁବ୍ ଏକାଗ୍ରତା ସହକାରେ ଶୁଣିଥାଏ। ଏକ ପୌରାଣିକ କଥା ଅନୁସାରେ, ଯେତେବେଳେ ଦେବ ଦେବ ମହାଦେବ ମାତା ପାର୍ବତୀଙ୍କୁ ‘ଅମରକଥା’ ଓ ବ୍ରହ୍ମଜ୍ଞାନ ଶୁଣାଉଥିଲେ, ସେତେବେଳେ ମାତା ପାର୍ବତୀ ଶୋଇପଡ଼ିଥିଲେ; ମାତ୍ର ନିକଟସ୍ଥ ଗଛରେ ବସିଥିବା ଏକ ଶୁକ ପକ୍ଷୀ ସେହି ସମସ୍ତ ଜ୍ଞାନକୁ ଧ୍ୟାନର ସହ ଶୁଣୁଥିଲା। ପରବର୍ତ୍ତୀ ସମୟରେ ସେହି ଶୁକ ପକ୍ଷୀ ହିଁ ମହର୍ଷି ‘ଶୁକଦେବ’ (ଶୁକମୁନି) ଭାବେ ଜନ୍ମଗ୍ରହଣ କରି ରାଜା ପରୀକ୍ଷିତଙ୍କୁ ଶ୍ରୀମଦ୍ ଭାଗବତ କଥା ଶୁଣାଇଥିଲେ। ଏଥିରୁ ସ୍ପଷ୍ଟ ଜଣାପଡ଼େ ଯେ ଶୁଆର ଶ୍ରବଣ ଶକ୍ତି ଓ ମନେରଖିବା କ୍ଷମତା କେତେ ପ୍ରଖର।
ଘରେ ରଖିବା ବେଳେ ସାବଧାନତା:
ଶୁଆ ସାମ୍ନାରେ କେବେହେଲେ କଳି-ଝଗଡ଼ା ବା ଖରାପ ଭାଷା ପ୍ରୟୋଗ କରନ୍ତୁ ନାହିଁ; କାରଣ ଶୁଆ ତାହା ତୁରନ୍ତ ଶିଖିନିଏ ଏବଂ ଅନ୍ୟମାନଙ୍କ ଆଗରେ ପ୍ରକାଶ କରିଦିଏ। ଏହା ସହିତ କୁହାଯାଏ, କେବଳ ଗୋଟିଏ ଶୁଆ ପାଳିବା ଅପେକ୍ଷା ଶୁଆ-ଶାରୀ ଯୋଡ଼ି ରଖିବା ଅଧିକ ଶୁଭଦାୟକ। ଶୁଆ ଘରକୁ ଆସୁଥିବା ଅତିଥି, ସଙ୍କଟ କିମ୍ବା ଚୋର-ଅଗ୍ନି ଭୟ ସମ୍ପର୍କରେ ଆଗୁଆ ସଙ୍କେତ ଦେବାର କ୍ଷମତା ମଧ୍ୟ ରଖେ।
ବାସ୍ତୁ ନିୟମ ଓ ଜୀବଦୟା:
ଶୁଆର ହାରାହାରି ଆୟୁଷ ପ୍ରାୟ ୫୦ ବର୍ଷ ପର୍ଯ୍ୟନ୍ତ ହୋଇଥାଏ। ବାସ୍ତୁଶାସ୍ତ୍ର ଅନୁସାରେ ଶୁଆର ପଞ୍ଜୁରୀକୁ ସର୍ବଦା ଉତ୍ତର କିମ୍ବା ଉତ୍ତର-ପୂର୍ବ ଦିଗରେ ରଖିବା ଉଚିତ।ଶୁଆକୁ କଦାପି ଲୁହା ପଞ୍ଜୁରୀରେ ବନ୍ଦୀ କରି ରଖନ୍ତୁ ନାହିଁ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି— ଯଦି ପଞ୍ଜୁରୀ ଭିତରେ ଶୁଆ ଅଶାନ୍ତ ବା ଦୁଃଖରେ ରହେ, ତେବେ ତାହା ପରିବାର ପାଇଁ ଅମଙ୍ଗଳକାରୀ ସାବ୍ୟସ୍ତ ହୁଏ; ଏହାଦ୍ୱାରା ଘରେ ଅଶାନ୍ତି ବଢ଼େ ଏବଂ ଆୟୁ-କ୍ଷୟ ହୁଏ ବୋଲି ଶାସ୍ତ୍ରରେ କୁହାଯାଇଛି। ପ୍ରକୃତିର ସମସ୍ତ ପକ୍ଷୀ ମୁକ୍ତ ଆକାଶରେ ଉଡ଼ିବା ପାଇଁ ହିଁ ଜନ୍ମ। ତେଣୁ କୌଣସି ଜୀବକୁ କଷ୍ଟ ଦେଇ ବନ୍ଦୀ ରଖିବା ଅପେକ୍ଷା, ତାକୁ ମୁକ୍ତ କରିଦେବା ସବୁଠାରୁ ବଡ଼ ପୁଣ୍ୟର କାର୍ଯ୍ୟ।