\n\n\n\n\n\n\n

ରାଜ୍ୟପାଳଙ୍କୁ ସୂଚନା କମିଶନଙ୍କ ଭୁଲ ତଥ୍ୟ ? ସତ ଧରାପକାଇବ ଓସା!

ସୂଚନା କମିଶନଙ୍କ ଦାବିକୁ ଚ୍ୟାଲେଞ୍ଜ କଲା ଓସା!

୧୮ ମାସରେ ୧୬,୫୦୦ କେସ୍ କମିଲା କେମିତି?

ସମ୍ପୂର୍ଣ୍ଣ ସତ ସାମ୍ନାକୁ ଆଣିବ ଓସା!

୮୫୦ କେସ୍ ବିନା ଶୁଣାଣିରେ ବନ୍ଦ ଅଭିଯୋଗ!

ରାଜ୍ୟପାଳଙ୍କୁ ଦିଆଯାଇଥିବା ତଥ୍ୟ ଉପରେ ଉଠିଲା ପ୍ରଶ୍ନ!

ଆୟୋଗର କାର୍ଯ୍ୟଦକ୍ଷତା ନେଇ ଆରମ୍ଭ ହେଲା ବିବାଦ!

ରାଜ୍ୟପାଳଙ୍କୁ ଭେଟିଲେ ସୂଚନା କମିଶନର! ନିଜ କାର୍ଯ୍ୟର ସଫଳତା ବଖାଣିଲେ। ଦାବି କଲେ, ମାତ୍ର ୧୮ ମାସରେ ୨୨ ହଜାର ବିଚାରାଧୀନ ମାମଲାକୁ ହ୍ରାସ କରି ୫ ହଜାର ୫୦୦ରେ ପହଞ୍ଚାଇଛନ୍ତି। କିନ୍ତୁ ଏହି ଦାବିକୁ ନେଇ ଏବେ ବଡ଼ ପ୍ରଶ୍ନ ଉଠାଇଛି ଓସା! ଅଭିଯୋଗ ହେଉଛି, ମାମଲା କମିବା ପଛରେ ରହିଛି ଅନ୍ୟ କାହାଣୀ! ପ୍ରାୟ ୮୫୦ଟି ମାମଲା ବିନା ଶୁଣାଣିରେ ବନ୍ଦ କରାଯାଇଥିବା ନେଇ ମଧ୍ୟ ଉଠିଛି ଅଭିଯୋଗ। ତେବେ ସତ କ’ଣ? ଆୟୋଗର ସଫଳତା ନା ଓସାର ଅଭିଯୋଗ? ଏବେ ଏହାକୁ ନେଇ ବଢ଼ିଛି ଚର୍ଚ୍ଚା।

ସୋମବାର ରାଜ୍ୟ ମୁଖ୍ୟ ସୂଚନା କମିଶନର ମନୋଜ ପରିଡ଼ାଙ୍କ ନେତୃତ୍ୱରେ ଓଡ଼ିଶା ସୂଚନା ଆୟୋଗର ଏକ ପ୍ରତିନିଧି ଦଳ ରାଜ୍ୟପାଳ ରଘୁବର ଦାସଙ୍କୁ ସୌଜନ୍ୟମୂଳକ ସାକ୍ଷାତ କରିଥିଲେ। ଏହି ସମୟରେ ଆୟୋଗର କାର୍ଯ୍ୟପଦ୍ଧତି ଏବଂ ଉପଲବ୍ଧି ବାବଦରେ ରାଜ୍ୟପାଳଙ୍କୁ ଅବଗତ କରାଯାଇଥିଲା।

ଆୟୋଗର ଦାବି ଅନୁସାରେ, ଏକ ସ୍ୱତନ୍ତ୍ର ଅଭିଯାନ ମାଧ୍ୟମରେ ମାତ୍ର ୧୮ ମାସ ମଧ୍ୟରେ ବିଚାରାଧୀନ ମାମଲା ସଂଖ୍ୟା ୨୨ ହଜାରରୁ ୫ ହଜାର ୫୦୦କୁ ହ୍ରାସ କରାଯାଇଛି। ଶୁଣାଣି ଦିନ ହିଁ ସଂକ୍ଷିପ୍ତ ଆଦେଶ ଜାରି, ଓଡ଼ିଆ ଭାଷାରେ ଶୁଣାଣି, ଭର୍ଚୁଆଲ୍ ବ୍ୟବସ୍ଥା ଏବଂ ଅନଲାଇନ୍ ଆବେଦନ ଭଳି ପଦକ୍ଷେପ ନିଆଯାଇଥିବା ମଧ୍ୟ କୁହାଯାଇଛି।

କିନ୍ତୁ ଆୟୋଗର ଏହି ସଫଳତାର ଦାବିକୁ ନେଇ ଏବେ ଆପତ୍ତି ଉଠାଇଛି ଓଡ଼ିଶା ସୂଚନା ଅଧିକାର ଅଭିଯାନ ବା ଓସା। ଅଭିଯାନର ଆବାହକ ପ୍ରଦୀପ ପ୍ରଧାନଙ୍କ ଅଭିଯୋଗ, ରାଜ୍ୟପାଳଙ୍କୁ ଆୟୋଗ ପକ୍ଷରୁ ଦିଆଯାଇଥିବା ସଫଳତାର ଚିତ୍ର ବାସ୍ତବ ସ୍ଥିତିକୁ ପୂରା ଭାବେ ଦର୍ଶାଉନାହିଁ।

ତାଙ୍କ ପ୍ରଶ୍ନ ହେଉଛି, ଯଦି ୧୮ ମାସରେ ଏତେ ସଂଖ୍ୟକ ମାମଲାର ସମାଧାନ ହୋଇଛି, ତେବେ କେଉଁ ପଦ୍ଧତିରେ ଏହା ସମ୍ଭବ ହେଲା? ମାମଲାଗୁଡ଼ିକର ଶୁଣାଣି ଏବଂ ଆଦେଶନାମାର ସମ୍ପୂର୍ଣ୍ଣ ତଥ୍ୟ ସାର୍ବଜନୀନ କରାଯିବା ଦରକାର ବୋଲି ଓସା ଦାବି କରିଛି।

ଓସାର ସବୁଠାରୁ ବଡ଼ ଅଭିଯୋଗ ହେଉଛି, ପ୍ରାୟ ୮୫୦ଟି ମାମଲା ବିନା ଶୁଣାଣିରେ ବନ୍ଦ କରାଯାଇଛି। ଆବେଦନକାରୀଙ୍କୁ ନିଜ ପକ୍ଷ ରଖିବାର ସୁଯୋଗ ନଦେଇ ତରବରିଆ ଭାବେ ମାମଲା ଶେଷ କରାଯାଉଥିବା ଅଭିଯୋଗ ମଧ୍ୟ ଆଣିଛନ୍ତି ପ୍ରଦୀପ ପ୍ରଧାନ। ତାଙ୍କ କହିବା ଅନୁସାରେ, କିଛି ଶୁଣାଣି ମାତ୍ର ଗୋଟିଏ ମିନିଟ୍ ଭିତରେ ଶେଷ ହେଉଛି। ଏପରି ସ୍ଥିତିରେ ଆବେଦନକାରୀଙ୍କୁ ନିଜର ଅଭିଯୋଗ ରଖିବାକୁ କେତେ ସୁଯୋଗ ମିଳୁଛି, ତାହା ଉପରେ ଓସା ପ୍ରଶ୍ନ ଉଠାଇଛି।

ସେହିପରି ସଂକ୍ଷିପ୍ତ ଆଦେଶନାମା ଏବଂ ଓଡ଼ିଆ ଭାଷାରେ ଶୁଣାଣିକୁ ନେଇ ମଧ୍ୟ ଓସା ଆପତ୍ତି ଉଠାଇଛି। ଓଡ଼ିଆରେ ଶୁଣାଣି ହେଉଥିବା କଥା ଆୟୋଗର ଏକ ସଫଳତା ଭାବେ ଦର୍ଶାଯାଉଥିବା ବେଳେ, ଆଦେଶନାମା ମଧ୍ୟ ଓଡ଼ିଆରେ ଲେଖାଯିବା ଉଚିତ ବୋଲି ଅଭିଯାନ ଦାବି କରିଛି। ପ୍ରଦୀପ ପ୍ରଧାନଙ୍କ ଅଭିଯୋଗ, ଅନେକ ଆଦେଶ ଇଂରାଜୀରେ ଲେଖାଯାଉଛି ଏବଂ ସେଥିରେ ମଧ୍ୟ ତ୍ରୁଟି ରହୁଛି। ଏହା ସହ ଆୟୋଗର କାର୍ଯ୍ୟପଦ୍ଧତି ସୂଚନା ଅଧିକାର ଆଇନର ଉଦ୍ଦେଶ୍ୟକୁ ପ୍ରଭାବିତ କରୁଥିବା ଅଭିଯୋଗ ମଧ୍ୟ ସେ ଆଣିଛନ୍ତି।

ଏବେ ଏହି ବିବାଦକୁ ନେଇ ଆଉ ଏକ ପଦକ୍ଷେପ ନେବାକୁ ଯାଉଛି ଓସା। ଆୟୋଗ ପକ୍ଷରୁ ରାଜ୍ୟପାଳଙ୍କୁ ଯେଉଁ ତଥ୍ୟ ଦିଆଯାଇଛି, ତାହାର ବାସ୍ତବ ସ୍ଥିତି ଜଣାଇବା ପାଇଁ ରାଜ୍ୟପାଳଙ୍କୁ ସାକ୍ଷାତ କରିବାକୁ ସମୟ ମାଗିଥିବା କହିଛନ୍ତି ପ୍ରଦୀପ ପ୍ରଧାନ। ଅର୍ଥାତ୍, ଗୋଟିଏ ପଟେ ଆୟୋଗ ନିଜର କାର୍ଯ୍ୟକୁ ସଫଳତା ବୋଲି ଦର୍ଶାଉଛି, ଅନ୍ୟପଟେ ଓସା ଏହି ଦାବିର ସତ୍ୟତା ଯାଞ୍ଚ ପାଇଁ ପ୍ରଶ୍ନ ଉଠାଉଛି।

ତେବେ ଏବେ ମୁଖ୍ୟ ପ୍ରଶ୍ନ ହେଉଛି, ୧୮ ମାସରେ ୧୬ ହଜାର ୫୦୦ ମାମଲା କମିବା ପଛରେ ପ୍ରକୃତରେ କେତେ ମାମଲାର ଶୁଣାଣି ହୋଇଛି? କେତେ ମାମଲାରେ ଆବେଦନକାରୀଙ୍କୁ ନିଜ ପକ୍ଷ ରଖିବାର ସୁଯୋଗ ମିଳିଛି? ଆଉ ୮୫୦ଟି ମାମଲା ବିନା ଶୁଣାଣିରେ ବନ୍ଦ ହୋଇଥିବା ଅଭିଯୋଗର ସତ୍ୟତା କ’ଣ? ଏହି ସବୁ ପ୍ରଶ୍ନର ଉତ୍ତର ତଥ୍ୟ ଓ ଦସ୍ତାବିଜ ହିଁ ଦେଇପାରିବ। ଏବେ ନଜର ରହିଛି ଓସାର ପରବର୍ତ୍ତୀ ପଦକ୍ଷେପ ଏବଂ ସୂଚନା ଆୟୋଗର ପ୍ରତିକ୍ରିୟା ଉପରେ।